__

__

李克勤30年



李克勤呢幾年嘅行徑的確有唔少笑柄,甚至因為撐希師拉而招人討厭。星期日總唔想只係政治Hardcore,寫少少軟性嘢。

轉眼間佢出道30年,除咗我呢啲姑且算是Die-hard FANS 之外,好多人以為第一張專輯就是《命運符號》,又甚至好多人只記得隨著電視劇「淘氣雙子星」推出的《夏日之神話》而以為係第一隻碟。



但其實响《命運符號》之前仲有一隻《誰願分手》EP,入面得四首歌,仲只係得我到今日都唔敢掂嘅黑膠碟,之後又無復刻CD,所以我嘅珍藏只有從《命運符號》開始。不過都唔係全部齊,因為有啲專輯真係好垃圾,例如《Hackenation》(依家收埋咗籠底唔知邊忽)、《李克勤大樂隊》,同最新的三隻專輯都無入貨。

坦白講,克勤今年12月就踏入半百之齡,聲線真係開始出現疲態;但亦可能我都年紀大而總有一點鍾意舊嘢嘅習性,總係偏好住啲舊作品。

李克勤嘅賣點係「零瑕疵」,亦確實佢嘅唱功係好掂。用少少聲樂角度去講,佢嘅音域橫跨Tenor 同Bass,比張學友闊。可是廿幾年來太側重於音準方面嘅唱功,無乜感情投入。但拎嚟「炸機」其實幾正!

有跟開佢啲八卦新聞的都略有領悟佢好興寫歌嚟溝女。佢同盧淑儀結婚時被爆料,《你是我的太陽》是攞嚟溝佢,不過都唔係第一劑,最明顯嘅例子莫過於《My Shirley》,目標人物係邊個唔駛畫出腸啦。

佢過去嘅作品唔只情情塔塔,仲的確好多元化,乜嘢題材都有。《月半小夜曲》、《大會堂演奏廳》、《深深深》等情歌之外,最為人熟悉嘅相信莫過於《紅日》呢首所謂勵志歌。除此之外,有唔少作品其實係講佢自己。例如《命運符號》就好明顯講緊佢自己作為樂壇新人嘅希望同目標,相信係人都聽得出。但中期時段,尤其是星光尾、藝能頭,更有唔少「講自己」嘅作品。其中收錄於《當找到你》大碟第4首嘅《好戲之人》



就咁睇歌詞只係一首情歌,但如果睇埋當時係佢最低沉嘅時期 (1995年演唱會開四面台唔爆,都已經夠啦),首歌其實係叫盧淑儀「你走啦,唔好再跟住我呢個廢人喇」。某程度上可以話佢「都係一個男人」!而又客觀咁講,李克勤份人雖然好串,但本質都唔算壞嘅。

2013-3-27蘋果日報刊登的《港人回歸英國心?》一文,就提及過收錄於《破曉時份》專輯嘅《後會有期》,就是以當年嘅移民潮為題材所寫,可見佢唔係完全無時事觸覺。

講到呢度,或者好多人就好不齒佢近年嘅政治表態。無可否認的確幾令人討厭,而討厭之處,撇除立場取態,就是一邊廂「我討厭政治」但另一邊廂就擦晒支那共匪鞋。不過咁,唔係同佢辯護,細心回望返佢呢29年幾嘅歷程,响佢歌唱事業最低潮時除咗盧淑儀之外,就只有一個譚詠麟傍住佢、扶返佢起身。

再考古遠啲,1993年佢決意離開寶麗金,某程度上係有一種覺得自己懷才不遇嘅心態思想,即所謂「好勝」。但過檔星光之後星途係咁跌,直到《Reborn》專輯先叫做有返少少起色;跟住又因為版稅拗撬同星光解約過檔譚詠麟有份投資嘅藝能動音,點知更有如跌入深淵一沉不起,仲狂到寫首歌叫盧淑儀唔好再跟佢......

難得倫伯呢個對佢嚟講係無可多得嘅貴人,而譚詠麟嘅為人係點,見佢痴實曾志偉、陳百祥都唔駛多講啦。所謂「近豬者赤、近墨者黑」,加埋「仔細老婆嫩」(仲要係一個趕都唔走、死都要跟住佢一齊捱嘅港姐),好難唔會搞到今日咁嘅。就當我呢個死忠粉絲同佢辯駁,要怪都只能怪譚詠麟帶壞佢!

李克勤嘅音樂造詣點都有值得欣賞之處,「八卦新聞mode」佢對盧淑儀都算係咁。政治嘅嘢,支那共匪嘅統戰手段,唔好話一個歌手,就是普通港燦都唔係個個曉啦。算啦,無必要同佢計較。

返回主頁

沒有留言: